Færa í dagatal:

Robert Smithson (1938–1973) er þekktastur sem einn af upphafsmönnum umhverfislistar (Land Art Movement). Á þessari sýningu er lögð áhersla á verkið Brotinn hringur/Spíralhæð sem Smithson gerði í Emmen í Hollandi árið 1971. Verkið er eina umhverfislistaverk Smithsons í Evrópu en hann lést í flugslysi tveimur árum síðar, aðeins 35 ára gamall.

Á sýningunni gefur að líta flesta þá miðla sem Smithson notaði í listsköpun sinni, svo sem teikningar, ljósmyndir, bréf og kvikmynd sem hann var að vinna að þegar hann lést. Verkin veita góða innsýn í hugmyndafræði Smithsons um endurnýjun iðnaðarlands og hvernig hann skipulagði og byggði upp verkið Brotinn hring/Spíralhæð.

Þá verða sýndar þrjár kvikmyndir um önnur umhverfislistaverk Smithsons: Spiral Jetty, Mono Lake og Swamp. Eva Schmidt sýningarstjóri sýningarinnar verður viðstödd opnunina.

Færa í dagatal:

Ívar Valgarðsson (f. 1954) opnar sýningu sína Til spillis í Hafnarhúsinu á laugardaginn. Sýningin samanstendur af þremur veggmyndum af málningardropum sem hafa lekið á gólfið í A-sal í Hafnarhúsinu, auk þriggja ljósmynda.

Ívar beinir stafrænum smásjármyndavélum, sem ætlaðar eru til vísindarannsókna, að dropunum og varpar myndum í rauntíma á veggina, eins konar stækkuðum stafrænum málverkum af dropunum. Hann vekur þannig athygli á málningu sem hefur farið til spillis og færir sér í nyt gáleysi málarans, sem málaði veggi sýningarsalarins, með því að færa dropana aftur upp á veggina.

Síðasta sýningarhelgi á sýningu Ragnheiðar Jónsdóttur er á Kjarvalsstöðum helgina 19. - 20. janúar.

Sýningin er fyrsta yfirlitssýning á verkum Ragnheiðar en yfirskrift sýningarinnar er Hugleikir og fingraflakk - Stiklur úr starfsævi Ragnheiðar Jónsdóttur.

Á rúmlega fjörutíu ára ferli sínum hefur Ragnheiður skilað drjúgu lífsverki, sem lifir í myndhugsun Íslendinga. Eftir að hefja feril sinn sem listmálari var hún meðal frumherja í flokki þeirra sem settu grafíklistina í öndvegi í íslenskum listheimi á 8. og 9. áratug síðustu aldar.

Sýningarstjóri er Eiríkur Þorláksson.

Færa í dagatal:

Huginn Þór Arason, myndlistarmaður leiðir gesti um sýninguna Kjarval - Mynd af heild sem stendur yfir á Kjarvalsstöðum og gefur innsýn í  heildarverk listamannsins. Sýningin er í anda salon-sýninga, þar sem málverkin þekja alla veggi Kjarvalssalarins, frá gólfi og upp í loft án nokkurrar reglu.

Kjarvalssafneignin samanstendur af 5.392 verkum eftir listamanninn eða 5.159 teikningum, 188 málverkum auk annarra tegunda verka.

Viðburðurinn er öllum opinn, frítt er fyrir handhafa Menningarkortsins, en nánari upplýsingar um aðgangseyri eru hér.