Nokkur hundruð verk eftir Jóhannes S. Kjarval í eigu Listasafns Reykjavíkur voru dregin fram í dagsljósið á sýningunni Mynd af heild sem opnaði á Kjarvalsstöðum 21. desember 2012.

Listheimspekingurinn, Jón Proppé ræðir við gesti um merkan feril Ragnheiðar Jónsdóttur en yfirlitssýning á verkum hennar stendur nú yfir á Kjarvalsstöðum. Yfirskrift sýningarinnar er Hugleikir og fingraflakk - Stiklur úr starfsævi Ragnheiðar Jónsdóttur og spannar rúmlega fjörutíu ára feril listamannsins.

Ragnheiður hóf feril sinn sem listmálari en varð síðar meðal frumherja í flokki þeirra sem settu grafíklistina í öndvegi í íslenskum listheimi á 8. og 9. áratug síðustu aldar. Túlkun hennar á hversdagleikanum varð að táknmyndum samtímans, einkum á sviði kvennabaráttu og umræðu um sjálfsvitund einstaklingsins. Ragnheiður tók um 1990 að hverfa á vit teikningarinnar í listsköpun sinni, þar sem frjálslegt línuspil á stórum myndflötum skapar fjölbreytt mynstur og flæði. Frá þeim tíma hafa teikningarnar verið kjarninn í myndheimi Ragnheiðar.

Frítt er fyrir handhafa Menningarkortsins en nánari upplýsingar má finna á www.listasafnreykjavikur.is/heimsokn, allir velkomnir.

ROBERT SMITHSON: Brotinn hringur-Spíralhæð
19. janúar - 14. apríl
Hafnarhús

Robert Smithson (1938–1973) er þekktastur sem einn af upphafsmönnum umhverfislistar (Land Art Movement). Á þessari sýningu er lögð áhersla á verkið Brotinn hringur/Spíralhæð sem Smithson gerði í Emmen í Hollandi árið 1971. Verkið er eina umhverfislistaverk Smithsons í Evrópu en hann lést í flugslysi tveimur árum síðar, aðeins 35 ára gamall.
>Sjá nánar

 ÍVAR VALGARÐSSON - Til spillis
19. janúar - 14. apríl
Hafnarhús

Til Spillis eftir Ívar Valgarðsson (f. 1954) samanstendur af þremur veggmyndum af málningardropum sem hafa lekið á gólfið í A-sal í Hafnarhúsi, Listasafni Reykjavíkur, auk þriggja ljósmynda. Ívar beinir stafrænum smásjármyndavélum, sem ætlaðar eru til vísindarannsókna, að dropunum og varpar myndum í rauntíma á veggina, eins konar stækkuðum stafrænum málverkum af dropunum. Hann vekur þannig athygli á málningu sem hefur farið til spillis og færir sér í nyt gáleysi málarans, sem málaði veggi sýningarsalarins, með því að færa dropana aftur upp á veggina.
>Sjá nánar

FLÆÐI - Salon sýning af safneigninni
2. febrúar - 28. apríl 2013
Kjarvalsstaðir

Á þessari óvenjulegu sýningu gefst almenningi einstætt tækifæri til að sjá stóran hluta af safneign Listasafns Reykjavíkur. Sýningin mun taka stöðugum breytingum þá þrjá mánuði sem hún stendur yfir en verkum verður sífellt skipt út á sýningartímanum, jafnvel meðan gestir eru viðstaddir.
>Sjá nánar