News

Listasafn Islands

Uppáhaldsverk Hrefnu Sætran á sýningunni Flæði er Sprautumynd eftir Sverri Haraldsson

Listasafn Reykjavíkur hefur leitað til þjóðþekktra einstaklinga og beðið þá að velja sér uppáhaldsverkið sitt á sýningunni Flæði á Kjarvalsstöðum og segja gestum á sýningunni frá því á hverjum fimmtudegi kl. 12.15. Hrefna Sætran matreiðslumaður valdi verkið Sprautumynd (1963) e. Sverri Haraldsson (1930-1985).

Hrefna sagði þetta m.a. um ástæður fyrir vali sínu á verkinu:
„Vanalega er ég hrifnust af litríkum myndum með fólki og jafnvel dýrum en þegar ég kom inn á sýninguna Flæði var litadýrðin slík að ég fór alveg hina áttina og valdi einfalt, abstrakt verk. Valið kom sjálfri mér svolítið á óvart, en ég er virkilega ánægð með það. Mér finnst verkið virkilega fallegt og það myndi sóma sér vel heima hjá mér eða jafnvel á Grillmarkaðnum, veitingastaðnum mínum. Myndin gefur líka ímyndunaraflinu lausan tauminn og það er hægt að sjá ýmsar kynjamyndir út úr ljósbrotinu sem er málað á það.“
 

Um verkið
Málverkið, Sprautumynd (1963) er olía á tré. Verkið fór á uppboð hjá Gallerí Borg árið 1995 en seldist ekki. Listasafn Reykjavíkur keypti verkið að uppboði loknu. Verkið hefur m.a. hangið á skrifstofu Sorpu í Gufunesi. 

Um listamanninn Sverri Haraldsson
Sverrir Haraldsson (1930-1985) var sérstæður listamaður sem samtíminn átti erfitt með að átta sig á. Hann var undrabarn á mörgum sviðum og viðurkenndur hæfileikamaður þegar um tvítugt.
Sverrir  fæddist í Vestmannaeyjum árið 1930. Hann fór 16 ára til Reykjavíkur  og stundaði nám í Myndlista- og handíðaskólanum frá 1946-1949. Hann dvaldi við nám í París frá 1952-1953 og fór síðar til Berlínar og stundaði þar nám frá 1957- 1960.
Sverrir hélt fyrstu einkasýningu sína árið 1952 í Listamannaskálanum og var einn af brautryðjendum í formbyltingu meðal listamanna hér á landi. Auk listmálunar stundaði Sverrir útskurð í tré og fékkst við myndlistarkennslu.
Fyrri eiginkona Sverris var Sigrún Gunnlaugsdóttir. Síðar giftist hann Steinunni Marteinsdóttur leirlistakonu. Þau keyptu bóndabæinn Hulduhóla í Mosfellsbæ þar sem þau útbjuggu listastofur og íbúðarhús ásamt því að stunda búskap. Húsið og umhverfi þess var sjónrænt ævintýri. Garðurinn var stærsta listaverk Sverris en hann sagðist þó vona að það yrði ekki talið hans besta verk. Hann lést árið 1985 aðeins 54 ára gamall.

 



Printed of the web Reykjvik Art Museum, www.reykjvikartmuseum.is 29.09.2014